Page Back

Poems Index

To a Louse a poem by Robert Burns

To a Louse
Robert Burns
(On seeing a louse on a lady's bonnet at church!)


Ha! whare ye gaun, ye crowlin ferlie!
Your impudence protects you sairly:
I canna say but ye strunt rarely
Owre gauze and lace;
Tho' faith, I fear ye dine but sparely
On sic a place.

Ye ugly, creepin, blastit wonner,
Detested, shunned by saunt an' sinner,
How daur ye set your fit upon her,
Sae fine a lady!
Gae somewhere else and seek your dinner,
On some poor body.

Swith, in some beggar's haffet squattle;
There ye may creep, and sprawl, and sprattle
Wi' ither kindred, jumpin cattle,
In shoals and nations;
Whare horn or bane ne'er daur unsettle
Your thick plantations.

Now haud ye there, ye're out o' sight,
Below the fatt'rels, snug an' tight;
Na faith ye yet! ye'll no be right
Till ye've got on it,
The vera tapmost, towering height
O' Miss's bonnet.

My sooth! right bauld ye set your nose out,
As plump an' grey as onie grozet:
O for some rank, mercurial rozet,
Or fell, red smeddum,
I'd gie ye sic a hearty dose o't,
Wad dress your droddum!

I wad na been surprised to spy
You on an auld wife's flainen toy;
Or aiblins some bit duddie boy,
On's wyliecoat;
But Miss's fine Lunardi!—fie!
How daur ye do't?

O Jenny, dinna toss your head,
An' set your beauties a' abread!
Ye little ken what cursed speed
The blastie's makin!
Thae winks and finger-ends, I dread,
Are notice takin!

O, wad some Power the giftie gie us
To see oursels as others see us!
It wad frae monie a blunder free us
An' foolish notion:
What airs in dress an' gait wad lea'e us,
And ev'n Devotion!

To a Louse
Robert Burns

 

 
To a Louse poem - Robert Burns

 

A poem can paint a thousand images in your mind's eye. If you enjoyed this poem and appreciated the lyrics of To a Louse by Robert Burns you will find even more poem lyrics by this famous author, together with their biography and picture, by simply clicking on the Poem Index link below ! 

© 2016 Siteseen Ltd
Cookie PolicyBy Linda AlchinPrivacy Statement